عمر
مش عارفة ممكن يتقال لك إيه يا يا كابتن عمر...
ياترى حيكون كفاية إني أقول لك شكراً...
على وجودك وقت الزنقة
على ابتسامتك الواثقة اللي بتطمني
على تسجيل ذكرياتنا بحرفنة بصورك
على المزيكا اللي بتغسل روحنا
على كل فكرة جميلة فرحتنا
على كل حاجة اتعلمتها منك
على الحقيقة من غير رتوش
على صوتك مع العود والشجن الحنين
على شعرك الصادق اللي بيدي أمل في الحياة
على كونك الأخ والصديق اللي بحق وحقيق
مش عارفة يا عمر ممكن أقول لك إيه
بس أكيد أنت عارف أنك من الناس اللي
وجودهم في حياتي بيفرق كتير
ربنا يارب يكرمك ويحقق لك كل اللي تتمناه
و كل سنة وأنت طيب وفنان يا عمر
posted by Amira @ 10:26 AM
6 Comments:
صباح الفل يا عمي.. كل سنة وإنت طيب يا جميل.. في هذا اليوم المبارك الميمون أقدر أقول لك حاجة مهمة جدا، وهي إني بجد شايف فيك حاجات حلوة كتير.. حاجات أنا نفسي كنت أتمنى إنها تبقى فيّ.. منها كلامك الحلو اللي يعدي على العقل يوزنه وبعدين يروح ع القلب يخليه يرفرف من النشوة.. منها روحك اللي بتطير لفوق قوي وانت حاضن عودك وبتدندن.. وحاجات كتير تانية هنقعد نعد فيها كتير.. لكن اسمح لي يا عمر إني أقول لك إني زعلان منك.. والله زعلان بجد.. زعلان عشان عمر مش عارف يبقى عمر بجد.. زعلان عشان شايفك حابس نفسك في قمقم مليان حزن وهم.. زعلان عشان عمر اللي جاب لنا أسباب وجيهة للفرح مش لاقي لنفسه سبب واحد يفرحه.. مش كده وبس.. أنا حاسس إنك من ساعة ده ما حصل بقت بتصدر لنا من غير ما تحس أسباب وجيهة للحزن.. عمر أنا مش عايزك تزعل بس أنا باقول كده عشان باحبك.. أنا عايزك كل ما الهم يحاصرك تضحك وتعلي صوتك بالضحكة.. أسمعها ترن.. إنت يا عمر قلت عني إني أنا أبو البسمات.. إوعى تكون مفكر إن مفيش جوايا هموم تغرق مصر بحالها.. لا.. بس ولا يهمني بكرة أحلى آه والله العظيم بكرة أحلى.. طلع نفسك يا عمر من القمقم.. طير لفوق.. رفرف.. ضم الناس حواليك من تاني.. شع الفرحة من جديد.. وارجع دور من تاني على أسباب وجيهة للفرح، ووالله هاتلاقي.. عموما يا عمر كل سنة وإنت طيب.. ويا رب السنة الجاية تكون أحلى عليك وعلينا..
كل سنة وانت طيب يا عمر... مش عارفة أقول ايه عشان مش حاقدر أقول أكتر من أميرة وعمار...وعشان كلامي مش حيقدر يعبر أد ايه انت شخص مهم في حياتنا...وأد ايه كلنا فرحانين بك...ربنا يكرمك يا رب
عمر باشا..صباح أعياد الميلاد الحبوبة والبهججة..طبعا من دواعي الصدف السعيدة إن يوم ميلادك هذا العام توافق مع اتشاح المصرييين بالسواد ! طبعا ده شيء هايل ويديك أمل في بكرة وفي أن سنتك الجديدة هتبقى سو...بيضا والنبي بيضا إن شاء الله!..
لست في حاجة مني لأن أقول لك أنك من الناس اللي بحبهم بجد رغم إننا مختلفين في حاجات كتير "كفايةإنك نتاوي وأنا مطبعجي"بس بيعجبني فيك مخك الحلو وشعرك الموزون اللي بيرشق ف القلب ، وبيعجبني فيك لما تبادر وتبقى حلو كده"وأنت فاهمني طبعا !" بيعجبني فيك حبك للحياة أحيان كتير ضحكتك الصافية وإيدك لم تطبطب على في حب أن عارف أنه صادق ..بس كلمة أخيرة من واحد بيحبك لله ..أتفق مع الكابتن أحمد عمار في اللي كتبه ..وياريت تدور على أسباب وجيهه للفرح والبهجة..ياريت تفتح الشباك وتشم هوا جديد..جايز يكون ملوث حبتين ..بس ده الهوا الموجود دلوقتي ولازم نعيش معاه لأن الهوا الصناعي عمره مابيعش ويعمر..وجايز بكرة"يعني 2-6!" نقدر إحنا اللي نغير الهواء الملوث ده بهوا نظيف مليان حب وفرحة ..وبهججه..
صباح النور والإشراق والفل.... أنا دخلت النهاردة الصبح أول ما جيت على عمر في "تجربة".. وقلت له وهاقول له إني سعيدة بيه وليه حتى وأنا متشحة بالسواد الللي محسسني ببهججة على رأي أهل الدايرة الصبح... ومع إني متفقة شوية مع محمد وأحمد عمار، مش هتكلم لأنهم قالوا الزبدة، وتقريباً هيغيروا رأيهم شوية لو قرءوك النهاردة . كل سنة وإنت طيب يا عمر
وانتوا طيبين يا جماعة، أوعدكم إني هاحاول أكون أحسن، وسامحوني على أى نكد سببته من غير ما اقصد، لكن عزائي الوحيد، إنكو فاهمين ومقدرين الأسباب. وان شاء الله بكرة أحسن م النهاردة
مع اننا ماتكلمناش مع بعض كتير غير امبارح...مع اني مش فاهمك قوي ....بس حكيتلك حاجات محكيتهاش لناس اعرفهم بقالي سنين...يمكن لانك مستمع جيد...بمكن لاني لمست فيك انسان ممكن يفهم...والاهم ..يقدّر..ممكن بعد فترة من الزمن مانبقاش مع بعض...بس اكيد كل لما افتكرك...هتترسم على شفايفي ابتسامة تفاؤل وهقول...الله يمسيك بالخير يا عمر ...واحشني
كل سنة وانت طيب
Post a Comment
<< Home