الوداع
الوداع
مش عارفة كلامي هيبقي مفهوم ولا لأ بس اللي عاوزة أقولهولكم إن فيه أوقات الوداع بييجي وإحنا لسه موجودين وعادة ده بيبقى أصعب بس في زمن "العادي" أصبح إحساسنا بيه شيء عادي.
مش عارفة كلامي هيبقي مفهوم ولا لأ بس اللي عاوزة أقولهولكم إن فيه أوقات الوداع بييجي وإحنا لسه موجودين وعادة ده بيبقى أصعب بس في زمن "العادي" أصبح إحساسنا بيه شيء عادي.
posted by Eman @ 4:49 AM
11 Comments:
ايه ده يا إيمان؟؟؟ وليه؟
عشان ايه؟! ما احنا كنا بنتكلم ونلصم!!!!!! غلط.. ده غلط
عارفة يا إيمان حاقول لك كلام يمكن تستغربيه مني أنا بالذات..و خصوصاً بعد الأحداث الأخيرة اللي حصلت لي واللي غيرت نظرتي لنفسي ولمواقف معينة كنت متمسكة بيها وفي إيماني ببعض الأشخاص بشكل زلزلني... بس عارفة يا إيمان أنا لسه عندي أمل.... مش حاقول لك فينا... لأ... في حاجة أنا مش عرفاها بس هي موجودة... حاجة واحدة لسه جوايا ومتهزتش وهي إنه طالما فيه قلب بينبض يبقى حيحس بالحزن علشان يحس بجمال الفرح بعد كده... يعني لسه فيه أمل... وربنا يخلينا لبعض.. أو على الأقل يخليكي لي.... حاجة أخيرة أكيد أنت عرفاها إني فعلاً بحبك ومش ممكن أتنازل عنك أنت بالذات بأي شكل من الأشكال
اولا الكلام مش مفهوم .. وداع ؟ ولا فتور مثلا ؟ ولا يمكن خنقة أصبحت شيء "عادي" في زماننا زي ما بتقولي .. الوداع بالنسبة لي خروج حد من حياتي بشكل نهائي وده بيحصل نادر جدا - معايا على الاقل - يعني حتى لو مش بيجمعني مكان واحد مع الناس اللي بحبهم .. هم موجودين جوايا وفي قلبي وذكرياتي عشان كده عمري ما بقولهم وداع .. دول الناس اللي مش موجودين معايا مش كمان اللي بعيش معاهم اكتر ما بعيش مع اهلي في البيت !! بجد ربنا يخلينا لبعض .. نحنق بعض بقى نزهق بعض مش مشكلة .. مادام قادرين نستحمل بعض
في إيه ياحاجة بالظبط..وإحنا اللي كنا بنقول أن إيمان دي حاجة جامدة خالص ومتتهزش ..على رأي المرحوم ياسر عرفات" ياجبل مايهزك ريح"..
أجمدي كده وخليك رجولة..وبلاش كلام عن الوداع والذي منه ..
مش من هواة الكلام الإنشائي ..من نوعية إحنا هنقدر ..والأمل والحلبسة والحاجات دي..
بس كل اللي أعرفه ..أن اللي حب بحقيقي عمره ماهيقدر يكره..
خللي الغيوم تعدي كده وخليها تمطر شوية وتغرقنا وتغسلنا ..وبعدين نبقى نتكلم..عن اللقا والقرب..مش عن الوداع ..
إيمان..حول..هل تسمعني.؟!
أنا كنت باسمع "انكسر جوانا شيء"،فتحت دايرتنا لقيت إيمان كتبت اللي كتبته.. وأنا بارد عليها واستفسر وأستغرب، كنت باكتب نفس الكلام اللي باقوله.. بعد ما اخدت ترويحة بإني طبعت، ورحت وجيت، وخبطت برجلي الأرض وطفيت أغنية الكسور وشغلت
The Colour of My LOVE
، رجعت تاني عشان أقولك يا إيمو إنت وماريان، إني حتى الناس اللي
ودعوني -غصب عني وعنهم- ماودعتهمش وموجودين معايا وجوايا، في صحوي ومنامي... وحتى لو ادعيت إني خلاص يئست ومفيش أمل والهبل ده، بافضل أناقض نفسي وأحاول أرجعها تاني..بس نفسي ألاقي............ الله يسامحك يا إيمو.. والله ما انا ناقصة
أيوة..حول..هل تسمعني ..مردتيش ليه يا حاجة!!!!!!!
كلامي زي ما انت فهمته بالظبط يا محمد أنا خلاص ما بقتش قادرة أقاوم إحنا بجد انكسر جوانا شيء يا محمد الروح القديمة ما عادتش موجودة فخلاص قررت التفت لروحي ولشغلي لأن كلنا خدامين لقمة العيش زي ما انت عارف أقولك إيه خلاااااااااااااااص تعبت من المقاومة مقاومة الاحساس بأن الدنيا خلاااص خدتنا من بعض مش عايزة لا أكون شريرة ولال بتوع نظرية المقاومة لأن احنا اللي عملنا ده بايدينا فما نقدرش نلوم حد تاني وده اختيار الناس يبقى ليه تقاومه الأحسن تخليك معاه علشان ما نخسرهومش للأبد أنا ما ودعتش الناس أنا ودعت المشاعر اللي جمعتنا واللي للأسف خلاااص رسميا لازم يعلن وفاتها لأن ترددينا لأنها لسه موجودة زي البنت الصغيرة اللي لما بيموت أحد والديها مش عاوزة تصدق أنهم ماتوا بجد يعني ما عادتش هاتشوفهم تاني خلاااااااص فاهمني يا محمد متهيألي كده الأمور تبقى أوضح للكل
يا شاطر يا محمد يا هشام اسمها خليكي راجلة: مؤنث رجل اختراع أحمد وعمرو سمير (اخواتي) اللي كانوا صغيرين
أحدثكم من منزلي العامر الواقع بمنطقة الهرم الكائنة بالمحافظة الميمونة محافظة الجيزة... ياحاجة إيمان.. أنا كنت مفكرك الهرم شخصيا، وكنت كمان معتقد إن هتجتازي مثل هذه الأمور جيزة موفقة.. شوفي بقى يا ستي.. بابا جاب موز.. آه والله موز.. مش هانكر إن الوضع مش ولابد يا باشا لكن مش لدرجة وداع، وبتنجان والكلام السيكو سيكو ده.. صحيح إني مخنوق منكم وبالذات اللي بالك بالك لكن ماقدرش أنكر إني باحبكم.. (جاتكم القرف).. وإن بص وطل هي بقت دايرة حياتي اللي بادور فيها.. طبعا بص وطل مش الموقع.. لكن إنتم.. أيوه إنتم.. (جاتكم القرف مرة كمان).. إنتم بعبلكم وقرفكم وكده.. واللي متأكد منه إني إنتم كمان بتحبوني.. (جاتكم القرف مرة تالتة).. عموما يا إيمان لو اللي بيحصل بينا ده هيخلينا نودع مشاعرنا والكلام الكبير قوي اللي مابافهموش ده يبقى عليه العوض فينا وفي كل حاجة حلوة.. وبهذه المناسبة الجليلة (مين جليلة دي) أحب أقول لحضرتك إني هاعديهالك المرة دي لكن اللي مش هاعديه هو تجاوزك لأخوك الكبير في غيابه، ولا يفوتني في نهاية حديثي أن أقول لك جملتي الخالدة (بابا جاب موز).. وجاتكم القرف يا حبايبي
ميرسي يا عمو!!
فيه ايه يا ايمان؟ فيه ايه يا جماعة؟ أنا مخضوضة ومش فاهمة حاجة
Post a Comment
<< Home