عروسة المولد وأميرة وأنا .. وإنت ..ورقـ..احم!

بقالي فترة كل ما أبص في المراية ألاقي دبدوبة من الدباديب اللي كان اسمها "نعسانة الكسلانة" في وشي. مش قادرة أصدق إني ما عملتش أي "بوست" محترم ع الدايرة لحد دلوقت، واقتصرت مشاركاتي الخزعبلية على التعليقات وعلى الـ"شات"... واضح إن ظروفي بقت صعبة!

خلوني في الأول أحيي ابن الدايرة البار عمر باشا على فكرة الدايرة. "الويب وبي" أولع في الـ .. أولع ميت شمعة وأفقع لي كام زغروطة من العيار التقيل (ولو إن مش باعرف بيزغرطوا إزاي)، في "هاذوها" المناسبة الكبير (عديها يا أستاذ أحمد المرة دي).

تاني هام بقى، عاوزاكوا تتفرجوا ع اللي الآنسة أميرة عملته فيّا ع الصبح كده، وهي داخلة راسمة على وشها إبتسامة بريئة (من النوع اللي يخليك تقول في سرك "استر يا رب"!)

مش عارفة .. بجد ما تخيلتش إن طفولتي المشردة باينة قوي للدرجة دي. أميرة اشترت لي عروسة مولد أطول من خطيبي الأستاذ عاصم شخصيا. مش عاوزة أخليكم تدمعوا زي ما عملت فيكم ساعة الفانوس (اللي أميرة جابتهولي برضه) واحكيلكم عن أيام زمان اللي كان الواحد فيها مغسول وبريء و ..و..،

بس بجد بجد شعور جميل قوي إن الواحد يبقى متدلع! ..

العروسة أهيه بالمناسبة .. وهي حاليا على المكتب السابق لـ"مدام" إيمان **ضحكة شريرة ** عشان لو حد عاوز يتصور جنبها ولا حاجة **ضحكة عبيطة**. سلام دلوقت يا جودعان .. عندي بامية لازم اقمعها ..احم.