انا خااااااااااااااايف
لسة قاري في احد البلوجات الجامدة موضوع اثار اهتمامي
وخوفي جدا جدا.....
وهوة بتخاف من ايه ....هل بتخاف من الضلمة مثلا ...ولا بتخاف من الاماكن العالية
....صاحبة البلوج كانت بتخاف من حاجة غريبة جدا وهية المانيكانات الموجودة في
المحلات...وقالت انها بتخاف تبص في عينيهم ...وخصوصا لو كانت مانيكانات
اطفال...بتترعب منهم.....والناس فيما تخاف مذاهب....انا مثل وانا صغير كنت دايما
متخيا ان في حاجة تحت السرير..لدرجة اني كنت بخاف ان ايدي تكون باينة لحسن الحاجة
اللي تحت تعضني ...ولما كبرت شوية وايقنت ان مفيش حاجة تحت السرير....حسيت ان
الحاجة دي نقلت من تحت السرير ودخلت الدولاب....وهكذا...دايما في حاجة الواحد بيخاف
منها ....وخصوصا لو كانت مجهولة ليه.....كان ليو واحد صاحبي بيترعب موووووت من
القطط ...لدرجة انه مرة مدخلش بيتهم عشان كان في قطة واقفة على باب البيت ....ويا
حرام قعد في الشارع للفجر.....
قولولي بقى يا حلوين ...كل واحد فيكو بيخاف من ايه ..!!؟؟
posted by salateenoo @ 2:58 AM
4 Comments:
شوف يا أبوحميد.أنا بخاف من الضلمة..اه والله..وخصوصا لو كنت لوحدي في الشقة- زي اللي بيحصل الأيام دي- تخيل أنت قاعد في شقة لوحدك ومشغل الراديو..وهووووب..ياما..ضلمة أسود..مفيش حاجة خالص..كل الأشباح بقى تلاقيها ماشية بتتفسح قدامك..صوت المياة اللي نازل من الحنفية اللي أنت بغباءك نسيت تتأكد من إنك قفلته بيتحول لصوت أقدام مئات الشياطين..ربنا يكفيك شر الضلمة..وأنت لوحدك..
الراجل المحترم اللي أسمه أحمد خالد توفيق قال أن أقسى أنواع الخوف هو الخوف من بكرة..وأنا معاه رأيك أنت إيه؟
انا مريت بتجلربة الخوف من الضلمة زيك يالظبط بما إني عايش لوحدي برده ....بس الموقف اللي حصللي اداني مناعة ابدية ضد الخوف من الضلمة ...هبقى احكيلك عليه بيني وبينك عشان الفضايح...
بس الخوف من بكرة والخوف من المجهول خصوصا في الايام النيلة اللي احنا عايشينها دلوقتي هو اكتر انواع الخوف استمرارية مع البني ادم...
بهاء قال:
الخوف عريق في مصر
تركي ومملوك محتسب فلاحين
الخوف عظيم الرتبة عالي الجبين
كأنه نهر النيل على الأنهار
أما أخونا عمر فقال:
الخوف ..
ماهوش كائن خرافى بأجنحة
مستنى فوق ضهر الدولاب
علشان ف لحظة يخضنا
الخوف مرض..
سرطان بيكبر ..
فوق مراكز حسنا
الخوف ســــراب..
بس احنا صحرا كبيرة ليه
أما أنا فأقول -ش شعر طبعا،العفو-إن
أنا خوافة في حاجات وعند حاجات تانية بابقى زي الجبل ومش باصدق نفسي. بس أبشع لحظة لما يخاف من حاجة ومايكونش عارف ايه اللي هيحصل بعدها وتمتد اللحظة لحد ما يعرف.
أما الضلمة، فأنا ومحمد أخويا واحنا صغيرين كنا بنتخانق كل يوم تقريبا قبل النوم عشان هو عايز يطفي اللمبة السهاري اللي بابا حاططها مخصوص عشاني
وكان الحل الوسط إنه يجيب ورقة سميكة زي غلاف الصابون ويروح لاففها ع اللمبة وأنا أبقى واقفة جانبه أراقب هو غطى نسبة كام م اللمبة.. وأنا لي مغامرات مع الخوف وبلاش.. كفاية كده
منغير كلام معقد وكلاكيع .. أنا باخاف من الكلاااااااااااااب..
ومن التعابين .. ومن المستشفيات .. ومن دكاترة السنان ومن الحقن ..ومن بكرة عشان مش عارفة مخبيلي إيه .. ومن الموت عشان مش مستعدة له .. ومن نفسي لما أكون شريرة !
و .. كفاية كده .. هاروح أموت أحسن
Post a Comment
<< Home