Wednesday, April 20, 2005

إلا الموقف منين والنبي يا حاج؟ شالوه يابني

ألو يا دايرة.. تحية من عضو قديم قاعد جوة مربع أو مكعب مش عارف، بس الزوايا حوالية حادة شوية، ما علينا، الحياة حلوة..

كنت بامنّي نفسي بأسبوع حافل بالمناقشات والشد والجذب جوة الدايرة العامرة، خصوصا عشان موضوع الويب والورق ده، مش هاحكي في تفاصيل كتير هنا، على اعتبار ان المكان كله محاصر، لكن ممكن نتكلم بالسيم

الفكرة إننا كدة كدة هانتدبس في شغل، وكلنا تقريباً، أو مش كلنا، كتير مننا، عندهم آمال طموحة ولو على المستوى الشخصي البحت في مستوى أفضل من الأداء والإنجاز يضيفلنا كأشخاص قبل ما يضيف لأى حد تاني، دي حاجة.. تاني حاجة احنا عموماً بنعاني من جمود ابن لذينا من أول شكلنا في المراية لحد النظام الحاكم (ميحكمشي)، ومعروف طبعاً معوقات التغيير اللانهائية شخصية، وعائلية، وفكرية، واقتصادية وملوخية، إلخ إلخ

لكن مش دي فرصة والنبي؟ طب احنا عايشين ليه ولا مؤاخذة؟ عشان ناكل شبراوي ونتصور صورها ملؤها الابتسامات؟ يا فرحة قلبي!! يا جماعة الله يخليكم، الخرابة مش ناقصة عفاريت، واحنا مهمين بالضرورة، وعندنا قدرة ما على التغيير مش لازم نفقد إيماننا بيها، إحنا لو ضحايا فاحنا ضحايا نفسنا في الأساس، وأنا بالمناسبة أعظكم ونفسي، لإني.. ولا ما علينا، قلنا هنتكلم بالسيم هههههه

أنا باطالبكم كحد بيحب الحياة ومفترض فيكم الشيء ذاته، إنه أثناء الأجازة الطويلة دي وأثناء قرقشة حلاوة المولد وبعد زيارة عيادات الأسنان، إنه ناخد موقف، موقف، موقف
قوللي موقف، أى موقف.. إحنا عايزين إيه بالظبط، احنا ولا مؤاخذة قطيع؟ ولا عندنا أفكار ورؤية وآراء وقادرين على التغيير؟ خللونا نحاول نعني حاجة واحدة بنعملها مع بعض، لو ده حصل النفور اللي انتي حاساه ده يا أميرة هيختفي توماتيكي توماتيكي

أنا باعمل حاجات متخلفة كالعادة، بس باشوفني كدة مش بطال، ولا بطال.. قدركم بقى، هتستحملوني وتاخدوني على قد عقلي، ولا احط جزمة ف بقي واسكت؟.. والحمد لله مفيش أكتر من الجزم وانا مقاس بقي كاجوال.. تشاو

نشيد الصوباح

صباح الورد عليكم .. من موقعي هذا أحييكم وأبعت لكم سلاماتي الحارة الملهلبة.. وبنهدي الأغنية الجاية ..من طنط توتا لبابا طأطأ وللعكاريت الصغيرين أولادهم..بس يا ولد سيب الفازة .. احم .. اسمعوا دي -بما إن الدي جي مان
بتاعنا مش ف الموود- وانشكحوا عشان بكرة أجاااااازة
خلوها حلوة يا بنات
خلوها حلوة يا جدعان
املوها سرور وابتسامات
تلاقوها جنة رضوان

Tuesday, April 19, 2005

عروسة المولد وأميرة وأنا .. وإنت ..ورقـ..احم!


بقالي فترة كل ما أبص في المراية ألاقي دبدوبة من الدباديب اللي كان اسمها "نعسانة الكسلانة" في وشي. مش قادرة أصدق إني ما عملتش أي "بوست" محترم ع الدايرة لحد دلوقت، واقتصرت مشاركاتي الخزعبلية على التعليقات وعلى الـ"شات"... واضح إن ظروفي بقت صعبة!

خلوني في الأول أحيي ابن الدايرة البار عمر باشا على فكرة الدايرة. "الويب وبي" أولع في الـ .. أولع ميت شمعة وأفقع لي كام زغروطة من العيار التقيل (ولو إن مش باعرف بيزغرطوا إزاي)، في "هاذوها" المناسبة الكبير (عديها يا أستاذ أحمد المرة دي).

تاني هام بقى، عاوزاكوا تتفرجوا ع اللي الآنسة أميرة عملته فيّا ع الصبح كده، وهي داخلة راسمة على وشها إبتسامة بريئة (من النوع اللي يخليك تقول في سرك "استر يا رب"!)

مش عارفة .. بجد ما تخيلتش إن طفولتي المشردة باينة قوي للدرجة دي. أميرة اشترت لي عروسة مولد أطول من خطيبي الأستاذ عاصم شخصيا. مش عاوزة أخليكم تدمعوا زي ما عملت فيكم ساعة الفانوس (اللي أميرة جابتهولي برضه) واحكيلكم عن أيام زمان اللي كان الواحد فيها مغسول وبريء و ..و..،
بس بجد بجد شعور جميل قوي إن الواحد يبقى متدلع! ..

العروسة أهيه بالمناسبة .. وهي حاليا على المكتب السابق لـ"مدام" إيمان **ضحكة شريرة ** عشان لو حد عاوز يتصور جنبها ولا حاجة **ضحكة عبيطة**. سلام دلوقت يا جودعان .. عندي بامية لازم اقمعها ..احم.

Sunday, April 17, 2005

أغنيات ليلية

القلوب جواها نسمة
قادرة تهزم أى ريح
القلوب جواها بسمة
تحضن الزمن الجريح
لكننا
ازاى نداري جرحنا
من غير ايدينا ما تلمسه
وازاى هنسمع بعضنا
واحنا كلامنا بنهمسه
والقريب عمال بيبعد
والبعيد غرقان في دمعه
والغنا مبقاش بيسعد
لا اللي قايله
ولا اللي سامعه
بس انا برضه هاغني
مش هاسلم للتمني
وافضل احلم بالحقيقة
والحقيقة جوة مني

أغنيات صباحية

مررت في خيالي
أحلى من الخيال
يمر في التلال
وينثر الألوان
مررت في خيالي
يلفكي الحرير
تشتاقكي الغدير
أغرودة الزمان
برابا رابّا بابا
عمر المسحراتي