بحبكوا والله!

بحبكوا..والله

ياكل ولاد وبنات بص وطل وياكل عموم أهالي وسط الدائرة

ميرسي كتيييييييييير ومن هنا للسنة الجاية للاحتفالية الجميلة دي

الاحتفالية اللي خلتني أفهم بجد أن في الدنيا بهجة ..وحب حقيقي

ميرسي على التورتة وحديقة الحيوانات والبرنامج الإذاعي الفلتة وعلى الهدية اللي كانت ناقصاني في الجهاز بتاع العروسة! ميرسي للكاميرا وومان ميرسي لكل اللي شارك ولو بكلمة أو بنظرة تشجيع..

شكراعلى الضحكة الصافية والروح العذبة والفرحة الصادقة

أنتوا كويسين وحلوين قوي ..بس فيكم شوية حاجات صغيرة كده وكده هأبقى أقولكم عليها بعدين.."مش وقت نكد!"

باسم جميع المكفوفين بأشكركم..وعلى طريقة المغني اللامع الشاب حتى بعد أن تخطي الستين هاني شاكر

"بحبكم والله"

محمد هشام عبيه

ابن الدقهيلة البار"تقريبا"

نحن نعيش عصر الملاحم

منشور في جريدة الأخبار بتاريخ اليوم ، آه والنعمة

13 ملحمة حول (ولا مؤاخذة) انجازات الرئيس مبارك

*قدم كامل الفقي مدير عام إذاعة الكبار - باين عليه قاعد بقاله فترة - فكرة 13 ملحمة (فنية) تقدم حول انجازات الرئيس مبارك قبل انتخابات الرئاسة إلي أنس الفقي وزير الإعلام تحت عنوان 'اصحي يا عم تاريخ' وهي تسجيل لانجازات الرئيس مبارك خلال فترة توليه الحكم وهي ملحمة 'بطل الحرب' عن دور الرئيس مبارك كقائد للضربة الجوية في حرب أكتوبر، 'ملحمة السلام' عن مساعي مبارك من أجل السلام، 'ملحمة التواصل العربي' دور الرئيس في جمع الشمل العربي، ملحمة 'مبارك الانسان' ومواقف الرئيس الانسانية مع شعبه، وملاحم 'الصحة'، 'التعليم'، 'الوحدة الوطنية'، 'الامان'، 'البناء'، 'التنمية'، 'التواجد الدولي'، 'التوازن'، 'العطاء'. الملاحم تقدم في صورة دراما مع أغنية تتضمن افتتاح الرئيس مبارك للمشروعات القومية" .

ايه الجمال ده؟ عملوها الوحوش.. يخرب بيت ملاحمك يا شيخ

مش هاعرف أقول غير.....

صدقني يا محمد مش عارف أقول حاجة.. كنت محضر نفسي إني أتحفك بقصيدة من قصايدي في عيد ميلادك أو حتى يومية أو كلمتين على قد ما قسم لكن فعلا مش لاقي حاجة أقولها.. كل اللي أقدر أقوله إني بجد بجد باحبك.. يلاّ.. عموما.. كل سنة وإنت طيب يا صديقي وأخي العزيز

شخص مهم

مكنتش اعرف ان احنا معانا شخصية مهمة زي سعادتك

حديث بن هشام

الأخ الرائد الصحافي الثوري التقدمي الجدع محمد هشام عبية/ شوف يابني، انت نهارك أبيض وزى الفل، بعد ما كتبتلك عريضة طويلة عريضة، "بلوجر" عملها وضيّع اللي انا كتبته قبل ما اعملـّه بوست (جررررررررر). المهم قـُصره.. اوعى تفتكر إني يعني بمناسبة عيد ميلادك كنت باقول إني باحبك وانك من الناس اللي ارتحتلهم في وقت قليل، وإنك لا سمح الله صحفي موهوب بجد وانك جورنالجي ليه مستقبل رغم كل خلافاتنا الجورنالجية، ولا إنك مثلاً يعني (راجل) ويُعتـَمد عليك، ولا عن كونك حد خللى "بص وطل" مكان صالح للحياة، بل ومكان ممكن الواحد يحبه أحيانا!ً!!.. لا لا لا، مقلتش أى حاجة من دي، كل اللي كنت باقوله.. كل سنة وانت طيب يا صديقي الجميل، أتمنى لك سنين مزهرة وقلم بيكتب عننا بصحيح.

عمر مصطفى

بخصوص إعلان كفاية اللي أنا مشفتهوش

بخصوص موضوع إعلان كفاية اللي أنا مشفتهوش..

نقلا عن موقع إيلاف

محمد عبد الرحمن من القاهرة : في دليل جديد على تأثير شعارات حركة كفاية و العبارات المضادة لها، لجأت شركة سعودية توزع غسالات أتوماتيكية في الأسواق العربية للمظاهرات و شعار كفاية في أحدث إعلان لها بثته عدة قنوات أبرزها روتانا سينما، يصور الإعلان المستهلكين وقد نظموا مظاهرة يطالبون فيها باستمرار هذه السلعة رافعين لوحات كثيرة عادية تبرز امكانات الغسالة مثل النظافة والقوة والتحمل بالإضافة إلى لافتة تقول "مش كفاية " بينما رجل وحيد لا تعجبه الغسالة يحمل لافتة تقول "كفاية " فتتم محاصرته بنهاية الإعلان ويمسك به رجال الأمن باعتباره معارضا للغسالة التي تهتف لها الجماهير .الجدير بالذكر أن الفترة الماضية شهدت تصاعداً للشعارات المضادة لكفاية من المنتمين للحزب الوطني سواء الشعارات اللفظية في التجمعات مثل "مش كفاية مش كفاية إحنا معاك للنهاية " والكلام بالطبع عن الرئيس مبارك ، أو شعارات معلقة في الشوارع أحدثها وأبرزها "كفاية يا عملاء كفاية " وكانت الحركة المصرية من أجل التغيير قد اتخذت كلمة "كفاية " شعارا لها قبل عام تقريبا في إطار مطالبة الحركة بعدم التجديد للرئيس مبارك وعدم التوريث لابنه الأصغر جمال .

كفاية.. مش كفاية!!

امبارح وانا باتفرج على "روتانا سينما" كان فيه إعلان غريب بيتكرر كل شوية، يمكن يكون حد منكم شافه، والإعلان خير اللهم اجعله خير عن ماركة "هاس" للأجهزة المنزلية، وهى تقريباً موجودة بس في دول الخليج؛ فالإعلان نفسه مش مصري. المهم، الإعلان عبارة عن مظاهرة فيها ناس كتير لابسين أصفر، وهو اللون المميز للعلامة التجارية لـ "هاس"، والناس دي شايلين يفط صفرا برضه عليها كلام مش فاكره وغالباً مكانش ليه علاقة بالإعلان، وفي نفس الوقت بيظهر ع الشاشة صور لأجهزة هاس وكلام عنها، الإفيه إنه وسط اليفط اللي شايلها المتظاهرين اياهم، فيه ناس شايلة يفط مكتوب عليها "كفاية" واللي برضه لونها أصفر، وناس تانية شايلة يفط "مش كفاية"، وبيظهر بطل الإعلان اللي بيقرر الانضمام للمظاهرة، وبيمشي في أولها وهو شايل يافطة مكتوب عليها "كفاية"، وفجأة بيطلعله ظابط من تحت الأرض، بيقفشه وياخد منه اليافطة، ليتقدم المظاهرة أخ تاني، بس شايل اليافطة اللي مكتوب عليها "مش كفاية"، والناس بتمشي وراه والإعلان بيخلص على كدة!! هوه فيه ايه؟ والنبي اللي يشوف الإعلان ده ويفهم حاجة، يفهمنّي عشان أنا ابتديت اشك في نفسي، وسلمولي ع الجماعة.